اوعى يخلوك تشك في نفسك
( Gaslightin ) او ( التلاعب العقلى )
كتبت / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
كل يوم في علاقاتنا بنقابل ناس بتأذينا من غير ما ترفع صوتها … لكن بتكسر جوانا حاجات عمرها ما بتتصلح بسهولة.
فيه ناس ما تعرفش تزعق … لكن تعرف تلعب في دماغك!
تلاقيك فجأة بتشك في نفسك بتسأل … هو أنا فعلا حسيت كده؟
ولا كنت مبالغ؟
ولا يمكن محصلش أصلا؟
لو حصلك كده قبل كده…
يبقى محتاج تعرف عن التلاعب العقلى 👇
تعالى أحكيلك عن Gaslighting
او التلاعب العقلي 🫤👇
كلمة Gaslighting جايه من مسرحية وفيلم اسمه Gas Light سنة ١٩٣٨، عن راجل كان بيخلي مراته تشك في نفسها عن طريق إنه يقلل إضاءة البيت ويقنعها إن نور المكان زي ما هو 😔😔
التلاعب العقلى .. اصعب و أخطر مما تتخيّل!
في ناس ما بتصرخش … ولا بتشتم … ولا بتضرب … لكنهم بيلعبوا في عقلك!
يقنعوك ⚜️⚜️
إن اللي حسيته “مبالغة”
وإن اللي شُفته “محصلش”
وإن اللي زعلك “تفاهة”
لحد ما تبدأ تشك في نفسك و في إحساسك و في ذكرياتك 😣
لما تلاقي حد دايماً بيقلك
إنت بيتهيألك ‼️
ده محصلش ‼️
إنت حساس أوي ‼️
اعرف إنك قدام حالة Gaslighting ! او تلاعب عقلى
وده نوع من أنواع العنف النفسي بيخليك تشك في إدراكك للواقع وتفقد ثقتك في نفسك شوية بشوية 😶😶
إزاي تتعامل مع المتلاعب العقلي؟
1. صدق إحساسك قبل أي كلام
لو حاجة وجعتك أو ضايقتك، فده حقيقي حتى لو حاولوا يقنعوك بالعكس.
2. حط حدود واضحة
قول “مش هكمل الحوار بالطريقة دي” أو “ما ينفعش تشككني في إحساسي” وامشِ لو لزم الأمر.
3. اكتب المواقف
لما تسجل الأحداث والتواريخ، بتقدر ترجع لها وتفتكر الحقيقة بعيد عن تشويشهم.
4. ابعد عن الجدال العقيم
المتلاعب بيغذي قوته من تشكيكك بنفسك … انسحب وقت ما تحس إن الحوار بيتحوّل لفخ.
5. حط لنفسك شبكة دعم.
احكي لناس تثق فيهم أو أخصائي نفسي يساعدك تشوف الصورة بوضوح.
6. افتكر دايماً
مش كل الناس تستاهل توضحلها مشاعرك، خصوصاً اللي بيتعمدوا يلخبطوك.
اخيرا..
🚨 خد بالك …. لو دايماً بتشكك في إحساسك…
🚨 لو دايمًا بتعتذر رغم إنك مش غلطان …
🚨 لو بتنسى التفاصيل عشان هما غيروها …
يبقى فيه حد بيلعب بيك نفسياً
🛑 إوعى تسمح لحد يشككك في نفسك!
إحساسك حقيقي ✨
وذكرياتك حقيقية 🪄
وكرامتك تستاهل تحميها ✋
لو بتعدي بالتجربة دي … اعرف إنك مش لوحدك ❤️
